BUTUAN CITY – Patay ang bise mayor sa Ibajay, Aklan nga si Julio Estolloso human gipusil sulod sa iyang opisina sa munisipyo pasado alas-9 kaganinang buntag, Biyernes.
Base sa report, anaa si Estolloso sa session hall sa Sangguniang Bayan dihang mi-abot ang suspetsadong si Sangguniang Bayan kon SB member Mihrel Senatin nga nangayo og dokumento sa bise alkalde nga misangpot sa init nilang panaglalis hangtud nga milanog na ang lima ka buto sa armas resulta sa pagpanggawas sa mga tawong duna’y transaksyon sa maong munisipyo samtang gipa-uli ang mga empleyado.
Human sa insidente, dali nga misibat ang suspetsado apan boluntaryo kining misurender sa Ibajay Municipal Police Station samtang ang biktima gidala sa Ibajay District Hospital apan naproklamang patay pag-abot.
Nagpabilin nga hilom ang mga opisyal sa lungsod sa Ibajay ug pamilya sa biktima bahin sa panghitabo.
Ang suspetsado ug ang biktima pulos miyembro sa lokal nga partido politikal nga Tibyog-Akean rason nga padayon pang gi-imbestigahan sa kapulisan ang motibo sa maong insidente.
Sa laing bahin, imbes nga kasadya, nabalot sa kasubo ang pagsaulog sa tinuig nga Melchor’s Day sa Melchor Memorial School sa lungsod, diin nagsilbi nga principal si Vice Mayor Estolloso.
