BUTUAN CITY – Nasabutan sa lokal nga kagamhanan ning siyudad sa Butuan ug sa mga transport groups nga dili una magpasaka sa plitehan taliwa sa sunod-sunod nga pagsaka sa presyo sa mga produktong petrolyo.
Sa eksklusibong pakighinabi sa Bombo Radyo Butuan, gipadayag ni Reynaldo Deita, presidente sa Libertad White Transport Cooperative, ang pag-differ una sa usbaw sa plitehan bugti sa ihatag kanila nga 2-mil pisos nga subsidiya.
Gipasabot ni Deita nga ilang gihangyo ning mi-aging semana nga ang plitehan sa traysikol ug motorized trisicad himuon nang 12-pisos sa unang duha ka kilometro ug 2-pisos usab sa musunod nga matag-kilometro apan tungod sa hangyo sa city government, ipadaplin una nila kini.
Dugang ni Deita, ang ihatag nga subsidiya sa lokal nga kagamhanan, gawas pa sa paningkamutan sa City Transportation, Traffic and Management Department kon CTTMD nga ilang trabahuon ang pagpangayo og fuel subsidy gikan sa nasudnong kagamhanan nga gila-umang mu-abot sa 5-mil pisos.
Sa pagkakaron, padayon silang makatutok sa ihatag nga serbisyo ngadto sa mga sumasakay.
Gipadayag ni Deita nga mabuhi pa silang mga drivers ilabina kung dili lang sagulan og bisyo ang ilang pagpamasada apan ang problema, halos katunga ang makibhang sa ilang inadlaw nga kita.
Kini tungod kay gikan matud pa sa 700 hangtud 800-pisos kada-adlaw nga kita, mahimo na lang kini karong 300 hangtud 400-pisos.
Sa ilang kooperatiba, ila na lang matud pang gisabot ang mga tricycle operators nga dili tas-an ang abangan isip win-win solution sa kasamtangang sitwasyon.
