BUTUAN CITY – Kutob na lang ang pamilya del Castillo human namatay ang ilang kabanay dihang mitiklaob ang gisakyan niining motor banca sa kadagatan sa lungsod sa Placer, Surigao del Norte.
Gi-ila ni SPO1Arnold Manlimos sa Placer Municipal Police Station ang biktimang si Allan Gumban del Castillo, 48-anyos, minyo, residente sa P. Maurillo, Visayan Village sa Tagum City.
Sa eksklusibong interview sa Bombo Radyo Butuan, gipadayag ni Manlimos nga sakay sa motor banca ang biktima ka-uban sila Lloyd Raut-raut Tan, 29-anyos, og Wilbert Dubduban, 53-anyos, parehong ulitawo og residente sa Brgy. Sani-Sani lungsod sa Placer.
Gikan matud pa sila sa Brgy. Lakandula og pauli na sa Brgy. Sani-sani sakay sa maong bangka ig dihang naglawig na, kalit lang mibarog ang operator niining si Wilbert Tejano og nangihi og dinhi na kini mitiklaob.
Human nag-iyahay og luwas sa ilang kaugalingon, subling nakagunit sa bangka ang tulo kinsa nagtuong atua na sa baybay si del Castillo rason nga nakuratan na lang sila dihang nakitang natabunan diay kini sa ilawom nga bahin sa mitikla-ob nga sakyanang pandagat rason nga wala na kini maluwas pa. (Beth Ruiz)
