BUTUAN CITY – Nagpabilin pa sa ospital ang 17 ka tawong samaran sa pagpamanhig sa gidudahang mga miyembro sa rebeldeng grupong New People’s Army kon NPA ngadto sa patrol car sa kapulisan didto sa Brgy. Libuton, Borongan City, Eastern Samar.
Unang napatay si Patrolman Mark Jerome Rama samtang samdan usab ang upat pa ka pulis nga sila Patrolman Ric Capoquian Jr., Kevin Operario, Angelito Luterte ug Rey Sobrepena.
Namatay usab ang usa ka sibilyan samtang samdan ang laing 13 apil na ang duha ka mga menor de edad.
Sigon ni P/Col. Carlito Abriz, provincial director sa Eastern Samar Police Provincial Office kon ESPPO, mibiyahe ang 1st Eastern Samar Provincial Maneuver Force Company padulong sa ESPPO headquarters dihang dunay mibusikad nga improvised explosive device kon IED resulta sa pagkadamay sa mga tawong sakay sa traysikol ug gisundan sa pagpa-ulan og bala sa mga rebelde sa PNP patrol car rasong nahulog usab sa pangpang ang patrol car.
Gitu-uhang napulo ka mga rebeldeng NPA ang mi-atake sa mga pulis samtang duna’y uban pang mga rebelde nga nagpa-abot lang sa bukid dool sa nahitaboan sa krimen.
Sigon ni PLCol. Ma. Bella Rentuaya, information office sa Police Regional Office kon PRO-8, hugot nilang gikondena ang gihimo sa mga rebelde.
Mahinumdumang nakabaton usab og pag-atake ang mga NPA sa Brgy. Pinanag-an, Borongan City niadtong nakalabay nga Nobyembre 11 diin unom ka sundalo ang patay ug 20 usab ang nasamdan.
