BUTUAN CITY – Nahanaw nga daw bula ang usa sa duha ka mga buhatan sa Kabus Padatuon kon KAPA Community Ministry International dinhi sa dakbayan sa Butuan pila ka adlaw human gimando ni Pangulong Rodrigo Duterte ang pagpasira niini ka-uban ang uban pang mga investment schemes nga nagtunhay sa Mindanao.
Sa gihimong pagsusi sa Bombo Radyo Butuan sa ilang buhatan duol sa City Hall sa Brgy. Doongan, wala na ang ilang gisab-it nga tarpaulin sa gawas apil na ang mga dokumentong ilang gipilit og wala na usab ang presensya sa ilang mga miyembro nga kanhi puno-puno bisan og sayo pa sa buntag.
Samtang gibiyaan na usab sa ilang lider og sa pamilya niini ang usa pa nila ka buhatan sa may Brgy. Villa Kananga tungod kay atua matud pa kini sa Davao City aron suportahan ang panawagang rali sa ilang founder nga si Joel Apolinario.
Sa mga leaflets nga gipanghatag sa ilang gwardiya, mabasa ang kawala nila’y operasyon sulod sa napulo ka mga adlaw apan wala’y nakaltid nga petsa kung kanus-a kini magsugod og kanus-a usab sa matapos.
Samtang giklaro usab ni Butuan City administrator Rey Desiata nga hangtud karon wala pa nila na-serve ang cease and desist order sa Securities and Exchange Commission kon SEC bisan og duna’y advisory kanila si Interior and Local Government Sec. Eduardo Año.
Kini tungod kay gihulat pa nila ang Law Enforcement and Investor Protection Division personnel sa SEC-Central Office nga maoy magpatuman niini samtang sila, igo lang nga mag-assist.
