BUTUAN CITY – I-otopsiya pa ang patay’ng lawas sa usa ka grade 3 pupil sa San Isidro Elementary School sa lungsod sa Gigaquit, Surigao del Norte aron masayran ang tinuod nga hinungdan sa iyang kamatayon, pila ka oras lang human naka-inom og pangpurgang tambal nga Albendazole ning mi-aging adlaw.
Sa nakuhang record sa Police Regional Office kon PRO-13, gibutyag ni Police Senior Master Sergeant kon PSMS Zena Panaligan sa Public Information Office sa PRO-13, nga midangop sa police station sa maong lungsod si Ruel Guibo-ata og gitaho ang pagkamatay sa iyang pag-umangkong si Rhea Mae, residente sa Purok 5, Brgy. Villaflor sakop sa maong lungsod.
Sa eksklusibong pakighinabi sa Bombo Radyo Butuan, migawas sa imbestigasyon nga apil ang biktima sa mga batang gipatumar og pangpurga sa buntag pa lang og mi-uli sa pani-udto.
Mireklamo gilayon kini og pagsakit sa iyang tiyan human og kaon hangtud nga mireklamong mawala ang iyang panan-aw og natumba.
Dali kining gidala sa Gigaquit District Hospital og gibalhin sa Surigao del Norte Provincial Hospital diin gideklara kining dead on arrival.
Migawas pa sa ilang imbestigasyon nga laing duha ka mga grade 5 pupils ang nakasinati usab og pagsakit sa ilang tiyan nga naka-inom usab og Albendazole og na-confine sa Caraga Regional Hospital sa Surigao City.
Sa pagkakaron, padayon pa ang gihimo nilang imbestigasyon uban sa taga-Department of Health kon DOH-Caraga aron masuta ang hinungdan sa maong mga insidente.
