BUTUAN CITY – Gitawag ni kanhi Pangulong Rodrigo Duterte nga political skunk si kanhi Senador Antonio Trillanes IV, base na sa pag-asuy ni Vice President Sara Duterte atol sa pagduaw niya sa iyang amahan sulod sa detention facility sa International Criminal Court didto sa The Hague, Netherlands.
Kini ang tubag ni VP Sara sa nangutana kaniya kalabot sa padayong pagpasaka og kaso ni Trillanes batuk kaniya.
Gipadayag sa besi presidente nga iyang gikuhaan og ideya kalabot niini ang iyang amahan kondiin gitambagan matud pa siya nga pasagdan na lang si Trillanes tungod kay ang mga lakang nga gihimo niini, bunga sa iyang kasuya dayong tawag sa kanhi senador nga political skunk kon bisan unsa nga lihok o desisyon niini, konektado gayod sa pulitika tungod sa iyang ambisyong mabutang sa taas nga posisyon sa gobyerno.
Nasabtan matud pa nI VP Sara ang gusto sa iyang amahan kinsa dili ganahan mupatol sa mga bashers ug mga trolls nga alang kaniya nasobrahan tungod sa mga pasangil nga bisan isa, wala matud pa’y tinuod.
