BUTUAN CITY – Pipila ka pasahero ang na-stranded sa nagkadaiyang parte sa Metro Manila ning Huwebes, Marso 26, 2026 tungod sa duha ka adlaw nga transport strike nga gikasa sa grupong MANIBELA batuk sa padayon nga pagtaas sa presyo sa lana.
Sumala sa National Capital Region Police Office (NCRPO), dunay mga commuter pa gihapong mobiyahe bisan og dunay abiso na sa hunong-pasada rasong nadugangan ang ihap sa mga naapektuhan.
Natala ang mga stranded nga pasahero sa pipila ka lugar sa Manila, Quezon City, Pasig, Taguig, Parañaque, Las Piñas, ug Malabon.
Bisan paman niini, gibutyag sa kapulisan nga walay natalang kagubot sa mga lugar sa protesta.
Misalmot sa strike ang nagkadaiyang sektor sa transportation lakip ang jeepney drivers, bus operators, TNVS, motorcycle taxis, ug UV Express.
Usa sa mga nag-unang panagtapok sa mga nagprotesta gihimo sa No To Oil Price Hike Coalition sa Aurora Boulevard sa Cubao, Quezon City.
Gipamugos sa mga grupo ang pagtanggal sa value-added tax (VAT) ug excise tax sa produktong petrolyo, pagpakunhod sa presyo sa lana sa P55 kada litro, ug pagbasura sa Oil Deregulation Law.
Lakip usab sa ilang panawagan ang dugang pamasahe, P1,200 family living wage, ug nasyunalisasyon sa industriya sa lana aron mapaubsan ang presyo niini.
Samtang nangandam usab ang nagkadaiyang ahensya sa gobyerno sa libreng sakay para matabangan ang mga apektadong commuter.
