BUTUAN CITY – Apektado na ang trabaho sa mga Pinoy sa South Korea tungod sa paspas nga pagkaylap sa Coronavirus disease 2019 kon COVID-19.
Sa eksklusibong pakighinabi sa Bombo Radyo Butuan sa Pinoy nga si Jolan Remedios nga taga Compostela Valley og kasamtangang nagtrabaho sa Gyeonggi-do- Province sa South Korea, gibutyag niining hugot ang pag-monitor sa ilang manager ngadto kanila diin dili sila pwedeng maglaag og bawal usab nga modawat og bisita.
Sumala pa niini, trabaho og balay ra ang ilang ruta samtang walay overtime usab aron dunay saktong pahulay og kanunay nga lig-on ang ilang immune system aron dili daling mataptan sa virus.
Gikansela na usab ang kada-Dominggo nga balaang misa.
Nag-panic na matud pa ang mga Pinoy tungod sa paspas nga pagkaylap sa maong virus sa South Korea diin kagahapon lang kapin sa 300 na ang kumpirmadong kaso nga nadugang samtang nagpabilin sa 12 ang nakalas.
Sa karun hugot ang pahimangno sa gobyerno nga dili mag-gawas-gawas, dili moadtu sa daghang tawo nga lugar, magsoot og face mask ug batasanon ang pag-disinfect kanunay sa ilang kamot.
