BUTUAN CITY – Layo ra sa tinuod nga makahatag og dakong impact ang gilusad nga Trillion Peso March 2.0 kagahapon sa EDSA People Power Monument.
Kini ang assessment ni Professor Gerry Caño, presidente sa Professional Criminologists Association of the Philippines kon PHAP. Gibutyag niini nga layo ra kini sa natigayong EDSA People Power 1 niadtong tuig 1986 nga nakaparalisa sa dagan sa pamatigayon tungod sa pagtapok sa kinabag-ang duot sa katawhan nga nakaparalisa bisan sa transportasyon.
Susamang senaryo usab matud pa ang nahitabo sa EDSA 2 apan layo ra ang senaryo kagahapon.
Gipadayag sa propesor nga ang pagtakda pa lang sa maong rali sa adlaw’ng Dominggo, usa na ka tima-ilhan nga dili gusto sa mga organizers nga mabalda ang trabaho, eskwela ug dagan sa pamatigayon sa kinatibuk-an.
Kini gawas pa nga sa parke lang gihimo ang pinaka-ulahing kalihukan sukwahi sa unang duha ka EDSA people power nga diha gayod sa kadalanan.
Gipadayag pa ni Caño nga ang pronouncement sa kasundaluhan kalabot sa maong kalihukan nagpakita lang sa kahuyang niini sukwahi sa EDSA 1 ug 2 kondiin nabali ang baruganan sa kasundaluhan human naparalisa ang regular nga kalihukan sa kauluhan.
