BUTUAN CITY – Malampusong napresenta ngadto sa mga tigbalita sa 401st Brigade, Philippine Army ang 19 ka mga rebeldeng New People’s Army nga parehong membro sa usa lang ka front human mitahan ngadto sa 75th Infantry Battalion, Philippine Army pagpanguna ni Lt. Col. Jaime Datuin og sa 26th IB pagpanguna ni Lt. Col. Romeo Jemenia pasado alas-dies kagabii sa lungsod sa Trento, Agusan del Sur.
Sa pagpresenta ni 401st Brigade Commander Gen. Andres Centino, gibutyag niini ang maong mga rebelde nga parehong sakop sa Guerilla Front Committee 3 sa Southern Mindanao Regional Committee sa NPA, gilangkuban sa tulo ka mga babaye og 16 ka mga lalaki.
Bitbit sa ilang pagtahan ang napulo ka mga high-powered firearms, lima ka mga short firearms, tag-usa ka hand grenade og rifle grenade, ubay-ubay nga mga magazines, kapin sa usa ka libo ka nagkada-iyang bala, tulo ka handheld radios og mga backpacks.
Nagsilbi matud pa nilang lider sila Kumander Boss og Kumander Sniper kondiin naglihok sila sa kabukiran sa mga lungsod sa Trento, Veruela og Sta. Josefa sa Agusan del Sur ingon man sa mga lungsod nga boundary sa Compostela Valley kon ComVal province. (Beth Ruiz)
