BUTUAN CITY – Gi-aresto sa kapulisan sa France si Telegram chief executive Pavel Durov sa usa ka airport sa amihanang bahin sa Paris human mitugpa ang iyang private jet sa Le Bourget Airport.
Sigon sa mga otoridad, na-aresto ang 39-anyos nga executive subay sa warrant may kalabutan sa mga kalapasang makutay sa sikat nga messaging app.
Nasayrang ang Telegram, sikat sa Russia, Ukraine ug nasud nga sakop sa kanhi Soviet Union.
Gi-ban kini sa Russia niadtong tuig 2018, human nagdumili si Durov pagtugyan sa user data apan gitangtang ang ban sa tuig 2021.
Ang Telegram lakip sa mga dagkong social media platforms sunod sa Facebook, YouTube, WhatsApp, Instagram, TikTok ug Wechat.
Gimugna ni Durov ang Telegram niadtong tuig 2013 ug mibiya siya sa Russia sa 2014 human wala musunod sa demand sa gobyerno nga i-shutdown ang mga opposition communities sa Kontakte social media platform, nga iyang gibaligya.
