BUTUAN CITY – Gipangandaman na sa Civil Aviation Authority of the Philippines (CAAP) Butuan ang pagdagsa sa mga pasahero ug posibleng madugang nga flights alang sa gitakdang pagpahigayon sa Palarong Pambansa sa Agusan del Sur karong sunod tuig, 2026.
Sumala ni Butuan Airport Acting Manager Atty Jinky Zaragoza-Ang, anaa sa napulo ka mga flights ang gina-cater sa Butuan airport, apan duna gihapon matud pa silay ma-cater nga mga special flights ug uban pang mga flights ilabi na kung dunay kalihukan sa Rehiyon.
Lakip nga gipreparahan sa nasangpit nga tugpahanan ang laing hugna sa full scale exercise sa ilahang buhatan agig sukod sa kahanas sa mga empleyado sa airport nga moresponde sa bisan unsang emerhensiya.
Gipangandaman usab niini ang posibleng kalihukan sa ASEAN dinhi sa Caraga region.
