BUTUAN CITY – Gihulat pa ang resulta sa gihimong proseso sa Scene of the Crime Operatives kon SOCO mahitungod sa natigayong buy bust operation nga miresulta sa pagkamatay sa target kaganinang mga alas 3:50 sa hapon sa may Purok-1, Barangay Bading ning siyudad sa Butuan.
Sa inisyal nga nakuhang impormasyon, 4 ka samad pinusilan ang nahi-agum sa target sa buy bust nga miresulta sa iyang hinanaling kamataron.
Sigon ni Police Sr. Inspector Jayward Dulatre sa Butuan City Police Station-2 kangsa maoy mikasa sa maong operasyon kauban ang Regional Special Operation Group sa Police Regional Office kon PRO-13, giila niini ang target nga si Jomar Cuevas, 33-anyos nga taga Purok-4, Barangay Obrero ning dakbayan.
Sumala pa sa opisyal nga sa dihang gihimu nila ang buybust operation, nakamatikod ang suspek nga pulis ang iyang ka-transaksiyun hinungdang mibunot kini sa iyang armas og gipabuthan ang operatiba. Walay mahimo ang kapulisan gawas sa pagbalos nga miresulta sa iyang kamatayon.
Giklaro usab ni Chief Sr. Inspector Dulatre nga anaa sa drug watchlisted og misurender na usab kaniadto ang suspetsado.
Alayon niini, mitambag nalang ang opisyal sa tanang katawhan nga samtang dunay paglaum pa nga mag-bag-o, kinahanglang buhaton na kini sa mga nalambigit sa ilegal nga drugas dungan usab sa pag-awhag nga dili nalang kini mosukol sa mga otoridad.
Apan sa kabahinan sa pamilya sa napatay, gipamugos niining nag-bag-o na si Jomar og wala na kini mibalik sa iyang kanhi bisyu.
