BUTUAN CITY – Nag-negatibo sa Covid-19 ang tanang personahe sa LTFRB-Caraga Regional Office, ma-regular man, contract of services og job order human sa gihimong Rapid Antibody Test kon RAT nga gihimo kaganinang buntag sa BMC Annex medical personnel ug gipahapsay sa City Government sa Butuan City.
Gipahigayon ang rapid testing sa tanang LTFRB personnel human ang gi-isyu nga office order nga pinirmahan ni Atty. Martin B. Delgra III, LTFRB Chairman, diin gimanduhan ang tanang opisyales ug empleyado sa LTFRB sa tibook nasud nga mopailalom sa rapid testing aron maghatag og safety precautions batuk sa pagkuyanap sa COVID-19.
Gipasalamatan ni Maria Kristina E. Cassion, LTFRB-Caraga OIC-Regional Director, ang Labaw nga Makagagahum tungod sa pagprotekta kanila diha sa ilang pagserbisyu lakip na ang Butuan City Government.
Naglaum si Cassion nga ang nasangpit nga resulta sa ilang rapid test, kansa nagnegatibo, magtuldok sa espikulasyon og diskriminasyon nga sila ang nagdala sa covid-19 tungod sa ilang contact sa LSIs, nga ang uban nag-test positive sa maong virus.
Adiser pa ang moratorium nga gi-aprubahan sa IATF sa sweeper flights og mercy trips sa Caraga LSIs kansa epektibo sugod niadtong Hunyo 22 ngadto sa Hulyo 4, 2020, nakahimu ang LTFRB Caraga sa pag-biyahe sa 1,878 ka mga tawo ilalom sa Hatid Estudyante Program and Balik Caraga sa mga na-estranded nga indibidwal.
Gipanawagan usab ni Cassion ang uban pang government agencies, ilabina kadtong mga nagtrabaho sa frontline transactions, nga ipailalom sa test ang ilang mga personahe ilabina kay gikumpirma sa DOH Caraga nga duna nay local transmission sa Butuan City, diin halos ang tanang government offices nahimutang ning siyudad.
