BUTUAN CITY- Gusto hatagan og pag-ila ni Surigao City Mayor Ernesto “Estong” Matugas Jr., ang Surigaonon nga nag-flat one ang grado sa UP Diliman nga si Sachika Azumi Saguisa.
Sumala pa ni Mayor Matugas iyang isugyot ngadto sa Sagguniang Panglungsod nga hatagan og recognition ang 19-anyos nga dalaga nga residente sa Ceniza Heights sa maong syudad human ang iyang nakab-ot.
Madumduman, paspas nga nag-viral sa social media ang Surigaonon kinsa first year Chemical engineering student sa usa sa mga sikat nga unibersdad sa nasud nga UP Diliman human sa “flat one” grades niini sa iyang unang academic year.
Sumala pa, yawi sa iyang pagbaton og taas nga grado ang pagbantay sa iyang mental health ug pagbaton og igo nga tulog.
Yawi usab ang pagpaminaw sa iyang mga magtutudlo ug pagtake notes sa mga gitudlo sa klase.
Dugang pa ni Saguisa, dakong tabang usab ang mga online tutorial videos aron masabtan niini ang mga lesson labi na sa iyang mga assignments.
Malipayon usab siya nga daghan ang nalipay sa iyang nakab-ot, apan adunay dugang matod pa kini nga pressure labi na anaa sa unang tuig pa lang siya sa kolehiyo.
Gusto niyang mapadayon kini sa mga mosunod nga semestre ug magsilbing inspirasyon usab kini sa uban nga tarungon pa ang ilang pag-tungha nga dili makompromiso ang mental health.
Nasayran nga sulod sa Top 10 si Saguisa dihang migradwar kini sa elementarya sa Surigao Education Center – Montessori, ug with highest honors usab siya dihang mag-graduate sa Caraga Regional Science High School.
Human ang engineering degree, plano niyang mosulod sa medical school, rason usab gipaningkamotan niyang pang-ayo nga ma-kuha kanunay ang taas nga grado. Nagpasalamat si Saguisa sa mga nagpadayag og ilang pagka-bilib kaniya.
