BUTUAN CITY – Nakatakdang mubalik na ang klase sa Surigao City karong adlawa, Lunes, human ang pipila ka semana nga pagpahulay tungod sa pagtay-og sa kusog nga linog.
Sigon ni Surigao City Public Information Office head Annette Villaces, isip kabahin sa pagsugod sa klase ipailawom una ang mga estudyante sa psycho-social debriefing aron paulian ang trauma nga dala sa nasangpit nga linog.
Nasayran nga una nang gipailawom sa de-briefing ang mga magtutudlo gikan sa nagkadaiyang tunghaan sa Surigao tungod sa epekto nga kahadlok sa 6.7 magnitude nga linog sa Surigao del Norte niadtong Febraury 10.
Samtang gi-assess pa karon sa lokal nga panggamhanan sa syudad sa Butuan ang pagpadala ug mga post traumatic guidance counsellor didto sa syudad sa Surigao aron mutabang sa debriefing ngadto sa mga na-trauma nga biktima.
Sa pakighinabi ning sibyahan, gibutyag ni Paolo Gogo, information officer sa Butuan City Government, nga ila pang I-assess ang kapasidad sa mga health facilities ning syudad hilabi na ang Butuan Medical Center kung kaya ba niining magpadala ug mga medical team alang sa post-traumatic counselling.
Hinuon gipasalig niini nga magpadayon sa gihapon ang ilang pagtabang sa nasangpit nga syudad sa bisan unsa man nga aspeto.
Gani, plano sa lokal nga panggamhanan nga magpadala ug mga engineers sunod semana aron mutabang sa pagsusi sa kondisyon sa mga istruktura nga natukod sa maong syudad.
