BUTUAN CITY – Padayon pang gipanubayan sa hingtungdang mga police units ang mga persons of interest sa sunod-sunod nga pagtulis sa LBC Express Incorporated – Tandang Sora branch ning siyudad sa Butuan ug Nasipit Branch sa lalawigan sa Agusan del Norte.
Sa eksklusibong interview sa Bombo Radyo Butuan, gikumpirma ni P/Chief Supt. Gilberto Cruz – regional director sa Police Regional Office kon PRO-13 ang maong kalambuan apan ang nagpalisod kanila sa pagtumbok mao ang kawala’y mga saksi sa maong panghitabo og wala usa’y direktang kuha sa CCTV footage.
Nasuta pa sa ilang gihimong imbestigasyon ang kahuyang sa seguridad sa maong courier company tungod sa kawala nila’y gwardiya og wala usa’y CCTV.
Alayon niini, girekomenda sa opisyal ngadto sa kadumalahan sa maong kompanya nga magbutang og gwardiya aron mabantayan ang mga shipments nga gisalig kanila o kaha magbutang og CCTV aron duna’y ilang kakuhaan og mga ebidensya higayong ma-usab pa ang ingon niini nga panghitabo.
Dungan pa sa opisyal, posibleng susamang grupo lang ang mihimo sa pagpanulis sa duha ka mga branches sa nasangpit nga kompanya. (Beth Ruiz)
