BUTUAN CITY – Padayon pang gipangita sa ginsakpan sa Butuan City Police Station kon BCPS-5 ang wala pa ma-ilang lalaking mipusil-patay sa usa ka sundalo ug sa igsoon niini human nagsinukmagay tungod lang sa pag-ilog og microphone didto sa Purok 18, Brgy. San Mateo ning siyudad sa Butuan.
Ang usa sa mga biktima gi-ilang si Guso Tayco, residente sa Purok 27 sa maong barangay samtang ang igsoon niini, residente usab sa Brgy. Salvacion, parehong sakop ning siyudad.
Migawas sa inisyal nga imbestigasyon sa kapulisan nga pasado alas-7:00 kagabii, nag-inom matud pa sa luyo sa tindahan ang sundalo ug nag igsoon niini dihang mi-abot ang suspetsado uban sa iyang ka-uban usab nga laing lalaki.
Sigon sa nakasaksi sa maong hitabo, dihang ila nang turno sa pagkanta sa suspetsado, kalit nga gibira sa sundalo ang microphone hinungdan nga nabugto kini og miresulta sa karambola hangtud nga gipusil na sa suspetsado ang managsoon kondiin patay on-the-spot ang sundalo samtang nakadagan pa pa-uli sa ilang panimalay ang igsoon niini ug wala na maka-abot pang buhi dihang gidala sa ospital.
Pito matud pa ka mga buto sa armas ang milanog sa dapit nga nahitabuan.
