BUTUAN CITY- Gipatin-aw ni Retired Executive Judge Emmanuel Escatron ang duha ka klase sa subpoena nga posibleng magamit sa proseso sa hustisya: ang Subpoena ad testificandum, diin ang usa ka tawo gipatawag aron motestigo, ug ang Subpoena duces tecum, nga nagmando sa pagpresentar og mga dokumento, rekord, o ebidensya nga may kalabutan sa usa ka kaso o imbestigasyon.
Sigon ni Escatron, sa dili pa mag-isyu og subpoena, ang presiding officer o hukom kinahanglan siguruhon nga adunay klarong kalambigitan ang gipangayo nga pamatuod o dokumento sa kaso ug dili kini makalapas sa katungod sa usa ka tawo.
Mipasidaan usab kini nga likayan ang gitawag og “fishing expedition,” diin mangita lamang og ebidensya bisan wala pay lig-on nga basihan, tungod mahimong magamit kini sa sayop nga paagi batok sa usa ka tawo.
Gipasiugda usab ni Judge Escatron nga ang korte kinahanglan magbalanse tali sa katungod sa nangayo og ebidensya ug sa pagpanalipod sa katungod sa usa ka giakusahan aron masiguro nga ang proseso sa hustisya dili mahimong instrumento sa pagpang-abuso.
Dugang pa sa Retired judge nga ang desisyong gipanaog sa Presiding Officer magdependi gihapon sa dokumentong gipandala sa korte kun nahi-uyon ba kini sa kasamtangang batakang balaod ug pamatuod nga wala gipahimuslan o gi-take advantage ang subpoena aron nga makapangdaot sa usa ka indibidwal.
