BUTUAN CITY – Ang sobra nga pag-hype sa mga Pinoy kang Miss Universe Philippines 2020 Rabiya Mateo diha sa social media maoy nakapaluya sa mga Filipino nga live nga mitan-aw kaganina sa Miss Universe 2020 coronation night human nga wala masulod sa Top 10 finalists ang pambato sa Pilipinas.
Kini ang panglantaw sa Cabadbaranon nga sI Ferdinand Nakila nga atua na nagtudlo sa Amerika human nakita nga nahawan na ang lugar nga gi-ukupahan sa mga Pinoy atol sa pageant diha mismo sa likod sa mga judges.
Posible usab matud pa nga na-ulit na ang mga judges tungod sa ilang kasaba kaayo nga manghugyaw higayong mugawas na si Rabiya samtang deadma lang kung laing kandidata na ang mugawas, bisan og deserving kining pakpakan ug daygon.
Tungod matud pa sa COVID-19 pandemic, duna’y mga parts sa pageant nga gitangtang sama sa ilang production o introduction number.
Kini pamatuod lang nga wala’y problema ang live events sama sa maong pageant basta gisunod lang ang minimum health standards. Sama sa mga kandidata nga gisalang gyod og maayo sa maong protocols gikan pa lang sa ilang sayo nga pag-abot sa pageant venue hinungdan nga wala na sila migamit og face mask.
