BUTUAN CITY – Gipatawag na sa Department of Transportation (DOTr) ang mga airline companies nga duna’y ruta sa Siargao Islands, lalawigan sa Surigao del Norte, aron makuhaan sa ilang panig kalabot sa reklamong grabe kamahal sa plitehan sa ilang mga biyahe.
Nasayrang migawas sa monitoring sa ahensya nga mu-abot sa P30,000 ang usa ka roundtrip air ticket, padulong ug pabiya sa nasangpit nga isla ug vice versa.
Reklamo sa mga turista, mas mahal pa ang maong plitehan kung ikumpara sa biyahe sa ubang nasud sama sa Japan.
Sigon ni DOTr Secretary Vince Dizon, tumong nila nga matumbok ang hinungdan sa grabe kataas nga plitehan ug mapangitaan og paagi nga makunhuran ang maong presyo.
Gipadalhan na sa maong ahensya og summon ang mga airline companies alang sa usa ka meeting nga himuon karong Agusto 26 kansa tambungan usab sa Association of Air Carriers of the Philippines, Civil Aeronautics Board (CAB) ug Civil Aviation Authority of the Philippines kon CAAP sa ingon mapangitaan og paagi nga mapabarato kini ilabina nga umalabot na ang holiday season.
