BUTUAN CITY – Padayon pang gi-imbestigahan sa Butuan City Police Station 4 ang natigayong pagpamusil-patay kagahapon sa Purok 5, brgy Taligaman ning siyudad sa Butuan aron masuta ang motibo niini.
Patay on-the-spot ang biktimang si Jegger Bascon, 30-anyos, duna’y kapuyo ug duna’y tulo ka mga anak. Sigon sa asuy sa iyang ka-ipon nga si Romelyn Villamor, nanglaba siya dihang giduol ang iyang pares sa usa ka lalaki samtang nagpanday sa ilang balay.
Nadunggan niyang gisuktan matud pa ang iyang pares og 2,500-pisos kondiin misangpot kini sa panaglalis hangtud nga milanog na ang buto sa armas ug dinhi na niya nakitang nagbuy-od na ang biktima nga wla na’y kinabuhi.
Aminado si Villamor, nga namaligya sa ginadiling drogas ang biktima human matud pa niya nadunggan sa naka-istorya niini kagahapon.
Samtang sigon usba sa amahan sa biktima nga si Arturo Bascon, base sa iyang nasayran, ang pagdula og scatter maoy gibuhi sa iyang anak ngadto sa iyang pamilya mao nga usahay mutabang siya og duna’y iyang matunol.
Samad sa kilid sa agtang ang iyang nakita sa biktima nga hayan maoy hinungdan sa kamatayon niini.
