BUTUAN CITY – Subling gibirahan ni Senador Rodante Marcoleta ang pagdumala ni Senador Ping Lacson sa Senate Blue Ribbon Committee kalabot sa imbestigasyon sa anumalusong mga flood control projects.
Sigon ni Marcoleta, samtang gilangay-langay ni Lacson ang pagpagawas sa resulta sa imbestigasyon, inanay matud pang gilihay sa chairman ang kamatu-uran sa mga nagapanghitabong kurapsyon sa mga proyekto sa gobyerno.
Samtang subay sa pamahayag ni Lacson nga paborito niya kining sawayon, giklaro ni Marcoleta nga iya lang gipahinumduman ang chairman sa Senate Blue Ribbon sa iyang katungdanan nga ipadayag ngadto sa katawhang Filipino ang iyang obligasyon nga ibulgar ang kamatu-uran sa imbestigasyon ug dili tagu-taguan ilabina nga pila ka buwan na kining natanggong.
Gipunto usab ni Marcoleta nga dugay nang gihulat sa katawhan nga masilutan ang mga dagkong opisyal sa gobyerno nga gilambigit sa kurapsyon ilabina nga wala pa gibulgar ni Lacson kung asa na napadulong ang dakong kwartang nahanaw gikan sa kaban sa katawhan.
Dugang pa ni Marcoleta, kung wala pa unta gikurakot ang trilyunes pisos nga pundong alang unta sa flood control projects, mahimo unta kining magamit sama karon nga nag-atubang og krisis ang nasud tungod sa padayong pagsaka sa presyo sa lana.
Sigon sa senador, dili unta ingon niini kabug-at ang epektong nabati sa katawhang Pilipino tungod sa sunod-sunod nga pagsaka sa presyo sa mga produktong petrolyo nga mugna sa giyera sa Middle East.
Andam na unta ang nasud kung anaa pa ang pundo nga mahimong magamit sa ingon niini nga sitwasyon.
