BUTUAN CITY – Gikostudiya karon sa Police Regional Office kom PRO-13 ang secretary general sa Kilusang Magbubukid ng Pilipinas kon KMP-Caraga nga si Virgilio ‘Ka Yoyong’ Lincuna, 68-anyos, minyo og residente sa Brgy. Banza ning siyudad.
Kini human siya gisikop kaganinang udto samtang nakigpulong sa iyang mga ka-ubanang mag-uuma sa ilang regional office sa Brgy. Tiniwisan ning siyudad subay na sa arrest warrant nga gi-isyu kaniya sa usa ka korte sa Lianga, Surigao del Sur.
Si Ka Yoyong usa ka lider sa mga mag-uuma sukad pa niadtong dekada 80 og sa kasamtangang secretary general sa Unyon sa mga Mag-uuma sa Agusan del Norte kon UMAN ug sa KMP-Caraga ingon man council member sa KMP.
Usa usab siya sa mga nanguna og nagpadaug sa away sa mga mag-uuma sa pagpataas sa presyo sa humay ug kopras, pagbatuk sa land-grabbing, pagpakunhod sa abang sa yuta, pagbarog sa tawhanong katungod batuk sa pasismo sa estado ug pagbatuk sa pagsulod sa mga higanteng minahan og plantasyon sa palm oil.
