BUTUAN CITY – Naghanyag og 200-mil pisos nga reward alang niadtong makahatag og impormasyon nga musangpot ngadto sa pagkasikop sa responsable sa pagpusil sa usa ka negosyanteng engineer niadtong weekend sa Purok 5, Brgy Ambago ning siyudad sa Butuan.
Kini subay na sa padayong pag-imbestiga sa Butuan City Police Station 3 sa maong insidente nga mi-angol sa biktimang si Engr Criz Remil Pagne, 35-anyos, duna’y ka-ipon ug residente sa Barangay Mandamo ning siyudad.
Madumdumang base sa inisyal nga imbestigasyon sa ginsakpan sa Butuan City Police Station 3, pasado alas-12:40 sa hapon niadtong Biyernes, dihang mi-abot sa dapit nga nahitabuan ang biktima aron mukuha og duha ka mga fire extinguishers alang sa iyang kliyente.
Dihang panaog na unta siya sa iyang sakyanan, kalit lang mitapad sa walang bahin sa iyang sakyanan ang wala pa mailang suspek dayong pusil kaniya sa makatulo ka higayon kondiin usa ka bala lang ang mi-igo sa iyang tiyan ug daling nanibat ang mga responsable padulong sa direksyon sa Brgy. Libertad.
Dali usab nga gidala sa Agusan Provincial Hospital ang biktima ug gibalhin sa usa ka pribadong ospital diin siya na-operahan ug anaa na sa luwas nga kahimtang.
Gawas sa cash reward, duna usa’y ihatag nga pahalipay niadtong makahatag og klaro nga CCTV o kaha dashcam footage sa mga suspetsado aron magamit sa padayong imbestigasyon ug paggpangita sa mga responsable aron mapanubag sa salaud nga ilang nahimo.
