BUTUAN CITY – Padayon pa gihapong gipangita sa mga otoridad ang tulo ka mga nabiling lawas sa upat ka mga minero nga natrap sa nibusikad nga tunnel sa bukirang bahin sa Sitio Cosep, Purok 11 Barangay Bayugan 3 Rosario Agusan del Sur niadtung Hulyo 3.
Sa kasamtangan, mingaw pa gihapon ang opisina sa Bayugan 3 Search and Rescue tungod kay hangtod ning mga taknaa, wala pa man nakabalik ang mga rescue team nga nitabang sa retrieval operation sa mga minerong natabunan.
Subay niini, gimando na ni Agusan del Sur Governor Santi Cane Jr. nga imbistigahan ang maong panghitabo. Andam na usab ang Provincial Mining Regulatory Board sa pagpagawas og closure order sa maong tunnel.
Alayon niini, gikabutyag usab sa tag-iya sa maong tunnel nga si Rotchelle Santos nga andam siyang tubagon ang tanang tulobagon kabahin sa nasangpit nga disgrasya.
Subay usab sa kapitan sa maong Barangay nga si Michael Rhay Hambala, wala pay kamanduan nga mokanaog na ang mga rescue team gikan sa maong tunnel, ug ipadayon pa gihapon ang operasyon taman sa makita na ang mga patayng lawas sa sa mga nabiling mineros.
Naila ang mga natrap nga sila si Arniel Alvarado -38 anyos, Richard Bustamante -28 anyos, Jangan Balagno -31 anyos, ug Jeffry Tabugon alyas Dior – 29 anysos.
Sayrang wala makagawas sa tunnel ang upat ka mga minero dihang mibuto ang gisudlan nilang tunnel niadtung Hulyo 3.
