BUTUAN CITY – Nagpasidaan si Davao City 1st District Rep. Paolo Duterte sa iyang mga kauban nga magbabalaud sa House of Representatives nga musuporta sa posibleng bag-ong impeachment complaint batok sa iyang igsoon nga si Vice President Sara Duterte, nga gila-umang ipasaka sa Pebrero 2026.
Sumala sa kongresista, ang pagduso sa impeachment kagustuhan ra matud pa, sa pipila ka tawo nga adunay kontrol sa pondo ug impluwensiya, ug dili tinuod nga tingog sa katawhan.
Dugang pa niini nga sa usa ka representative democracy, ang desisyon sa mga magbabalaod, angay ibase sa baruganan ug kabubut-on sa ilang mga nasakupan, ug dili sa pulitika ug patronage.
Madumdumang gideklara sa Korte Suprema nga unconstitutional ang mi-aging impeachment complaint batok kang VP Sara niadtong Pebrero 2025, tungod sa paglapas sa one-year ban ubos sa 1987 Constitution samtang pending pa gihapon ang motion for reconsideration sa Kamara.
Una nang mitumaw ang isyu sa bag-ong impeachment complaint batok sa Bise Presidente tungod kay matapos na sunod nga bulan ang one-year ban.
Posibleng ma-apil niini ang mga bag-ong alegasyon sa detinado nga si Ramil Madriaga, kinsa mi-angkong siya matud pa ang bagman sa Bise Presidente, kansang kampanya sa 2022 presidential elections gipondohan matud pa sa mga POGO operators ug drug lords.
