BUTUAN CITY – Gihulagway ni Mamamayang Liberal kon ML Rep Leila de Lima nga paglapas sa konstitusyon ug kakulang sa respeto sa publiko ang wala pagtambong ni Vice President Sara Duterte sa hearing sa House Committee on Justice ning adlawa kabahin sa iyang impeachment.
Sumala ni De Lima, makadismaya nga klaro kaayo nga wala gitagad sa Bise Presidente ang proseso dayong butyag nga kung dili man siya makatambong, dapat nagpadala matud pa kini og pormal nga sulat aron magpakita og respeto sa imbestigasyon.
Gipasabot usab ni De Lima nga ang nahitabo karon dili pa trial, kundili mura pa lang og preliminary investigation dayong lakbit sa opinyon ni Noel Tijam nga ang mga opisyal sa gobyerno, adunay obligasyon nga mutambong sa ingon niani nga imbestigasyon.
Nasayrang naglaum ang komite nga mutambong si Duterte aron motubag sa mga reklamo apan tungod sa iyang wala pagpakita, nagka-tensyon ang hearing.
Alang kang De Lima, ang ingon ani nga lihok nagpakita lang og kakulang sa respeto sa proseso sa impeachment.
