BUTUAN CITY – Gipasakaan og mga kasong sedition ug inciting to rebellion sa Criminal Investigation and Detection Group (CIDG) si Cavite Representative Kiko Barzaga.
Sumala ni CIDG Director Maj. Gen. Robert Alexander Morico II, ang kaso gipasaka nila sa Quezon City Prosecutor’s Office tungod sa pagsugod sa kagubot niadtong Setyembre 21 sa kalihokan nga gitawag og “Trillion Peso March.”
Wala na miahtag pa og dugang detalye si Morico sa rason nga basin makadaot kini sa imbestigasyon sa piskalya.
Sa usa ka social media post ni Barzaga, iyang gipakita ang subpoena nga nagmando kaniya nga motunga personal sa Quezon City Prosecutor’s Office karong Nobyembre 17 ug 25 alang sa preliminary investigation.
Madumdumang pila ka higayon nang nag-post si Barzaga sa iyang social media nga nag-akusa kang Pangulo Ferdinand Marcos Jr. nga maoy utok sa kurapsyon.
Siya usab ang nanguna sa pagtawag sa mga tawo nga magpahigayon og protesta sa atubangan sa Forbes Park sa Makati City, diin nagpuyo sila Leyte Rep. Martin Romualdez ug sa miluwat na sa katungdanan nga si Rep. Zaldy Co.
