BUTUAN CITY – Mi-resign na si Surigao del Sur 1st District Representative Romeo Momo Sr. isip miyembro sa bicameral conference committee, usa ka adlaw human siya gipasakaan og reklamong graft ug plunder ni Atty Mary Helen Polinar Zafra sa Ombudsman, may kalabotan sa mga kontrata sa gobyerno nga nakuha sa construction firm sa iyang pamilya, ang Surigao La Suerte Corporation nga nakabase sa Tandag City.
Sa iyang gipagawas nga sulat-pamahayag karong adlawa, gibutyag ni Momo nga iyang gihimo ang pagkanaog aron mapreserbar ang integridad sa institusyon ug malikayan nga madala sa kontrobersiya ang bicameral conference committee nga gitahasan pag-harmonize sa bersyon sa Senado ug House of Representatives sa 2026 National Expenditure Bill.
Gipunting usab niya nga ang iyang courtesy resignation dili pasabot nga pag-angkon sa sala sa mga akusasyon nga iyang gi-atubang. Sa reklamo nga gisang-at kagahapon, gi-akusahan siya nga nagpadayon gihapon pag-apil sa operasyon sa SLSC nga kanunay nakadaug sa mga kontrata sa public works sa Caraga region.
Nakalatid sa reklamo nga ang iyang asawa, mga anak, ug bisan apo nagpabilin nga shareholders sa maong kompanya nga nagmugna og conflict of interest sa pag-award sa mga proyektong pang-imprastruktura.
Gika-ingon pa nga nakabiya lang siya human sa tuig 2019 apan ang kompanya, nagpadayon pag-apil ug pagdaug sa mga biddings alang sa mga proyekto sa gobyerno.
