BUTUAN CITY – Nagkadipo-dipo pagdepensa si Pangulong Ferdinand ‘Bongbong’ Marcos Jr atol sa iyang gipatawag nga press conference nga naghisgot sa status karon sa nagpadayong imbestigasyon sa Independent Commission for Infrastructure kon ICI kalabot sa mga anumalusong flood control projects.
Kini human siya gipangutana kung nganong wala ma-apil sa gikasuhan, ang ubang mga kongresistang nalambigit sa maong anumaliya ilabina ang iyang ig-agaw nga si kanhi House Speaker Martin Romualdez.
Depensa sa pangulo, kabahin matud pa sa listahan ang pipila ka mga magbabalaud nga wala lang niya hisguti ang mga pangalan tungod sa ilang kadaghan. Hangtud nga dihang na-corner na sa follow-up question, gi-angkon na niini nga wala gayod ma-apil sa listahan si Romualdez tungod sa kawala matud pa’y lig-ong ebidensya sa iyang kalambigita sa nasangpit nga anumaliya.
Hinuon, gihagit niini ang tanan nga maghatag kanila og lig-ong ebidensya aron makasuhan kini ug ang uban pang angayang kasuhan.
