BUTUAN CITY – Gibulgar ni Cavite 4th District Representative Kiko Barzaga ang nadawat niyang impormasyon gikan sa intelligence network niini kalabot sa closed door investigation sa Independent Commission for Infrastructure kon ICI.
Sa video post ni Barzaga, gipadayag niini nga base matud pa sa report, mahimong state witness sa imbestigasyon sa flood control scandal si kanhi House Speaker Martin Romualdez aron damayon matud pa niini sila Senador Chiz Escudero, Joel Villanueva, Jinggoy Estrada, ug Mark Villar nga kanhi kalihim sa Department of Public Works and Highways kon DPWH, aron maprotektahan niini sa himuong imbestigasyon sa Senado ang iyang mga ka-alyado sa kamara nga sila Presidential son ug Cong. Sandro Marcos, Jay-Jay Suarez, Roman Romulo, ug Zia Alonto Adiong.
Dugang ni Barzaga, dunay usa’y report nga giplanohan na sa Commission on Elections (Comelec) nga ideklarang invalid ang ang May 12 2022 elections aron madiskwalipika si Vice President Sara Duterte ugaling mapalagpot sa katungdanan si Pangulong Ferdinand Marcos Jr.
Apan pagklaro ni Cong. Barzaga nga mga espekulasyon lamang ang maong mga impormasyuon gikan sa foreign intelligence. Padayon usab matud pang gitabunanan sa ICI ang kamatu-iuran sa ilang gihimong imbestigasyon dayong butyag nga magsilbi siyang mata sa katawhan.
Una nang gilimod sa Department of Justice (DOJ) ang pagkonsidera kang Romualdez isip state witness tungod kay wala matud pa’y gisang-at nga aplikasyon ang kanhi House Speaker sa DOJ alang niini.
