BUTUAN CITY – Wala’y lipod-lipod nga gipanganlan sa kanhi sundalo nga nahimong security consultant ni Ako Bicol partylist Rep Elizalde ‘Zaldy’ Co, nga usa siya sa mga tawong nag-deliver og minaleta nga mga kwarta ngadto kang Co ug kanhi House Speaker Martin Romualdez.
Sa iyang pag-atubang sa motu propio inquiry in aid of legislation sa Senate Blue Ribbon Committee, gipadayag ni Orly Regala-Guteza nga nagdesisyon siyang mupa-ambit sa iyang personal nga nasayran tungod kay dili niya kayang magpakahilom lang sa grabe ka kadakong kurapsyon nga gihimo sa duha ka kongresista kansa maoy magbutang sa ngitngit nga ka-ugmaon sa iyang mga anak, mga apo ug labaw sa tanan, sa kinabag-ang Filipino.
Iyang gisaysay nga dihang nagsugod siya sa iyang duty detail sa pinuy-anan ni Congressman Co niadtong Disyembre 5 ning mi-aging tuig 2024, kada-adlaw siyang nag-report sa Bonifacio Global City kon BGC aron maglabay og minaleta nga mga basura – ang termino sa binultong kwarta nga ipanghatud ngadto sa pinuy-anan sa duha ka kongresista.
Dugang pa ni Guteza, sa iyang kabahinan kung siya ang ma-detail nga security aid ni Co, katulo kada-semana siyang maghatud og mga basura ngadto sa balay sa duha ka kongresista.
Kasagari matud pa niyang mahatud, mu-abot sa 15 ngadto sa 18 ka mga maleta nga tungaon niya paghatud sa balay nila Co ug Romualdez.
Ang matag-maleta, duna matud pa’y sulod nga 48-milyunes pisos tungdo sa paskil nga gibutang sa gawas nga bahin niini. Ang pinakadaghan matud pa niya nga nahatud, mi-abot sa 46 ka mga maleta kondiin 35 niini ang iyang gihatud sa balay sa kanhi house speaker samtang ang 11 ngadto kang Co.
Sa balay ni Co, ang mga staff matud pa niini nga sila John Paul Estrada ug usa ka alyas Mark ang musugat kanila ug mukuha sa mga maleta.
