BUTUAN CITY – Didto sa Lianga Comprehensive National High School sa lungsod sa Lianga, Surigao del Sur, himuon sa Department of Education kon DepEd-Caraga ang regional launching sa Brigada Eskwela 2024 karong Lunes, Hulyo 22.
Sa pakighinabi ning sibyahan, gibutyag ni regional spokesperson Pedro Tecson nga igo na ang unom ka adlaw nga pagpanghinlo sa mga magtutudlo ug mga ginikanan aron ma-andam na ang tanan alang sa unang adlaw sa school year 2024-2025 nga sugdan sa sunod Lunes, Hulyo 27.
Bisan og dili matud pa tanang problema sa mga eskwelahan ang matubag atol sa unom ka adlaw nga pagpanghinlo, apan dakong tabang na kini aron dili na manghinlo ang mga bata pagsulod nila sa unang adlaw sa klase.
Libuang mga estudyante matud pa ang mu-eskwela karon nga schoo year kung basehan ang nagpadayong early registration nga gisugdan niadtong Enero ning tuiga.
Giklaro usab sa opisyal nga mudawat gihapon sila og mga late enrollees tungod kay dili man angayang balibaran ang kabataang gustong mutungha.
Samtang tungod sa sunod-sunod na nga mga pag-ulan, ila nang gi-activate ang School Disaster Risk Reduction and Management System aron ma-monitor ang kada-adlaw nga dagan sa panahon uban sa pag-abag sa mga national-line agencies.
