BUTUAN CITY – Nadiskubrihang aktibong miyembro sa Guerilla Front 16 sa New People’s Army kon NPA ang malapason sa community quarantine kinsa nasikop sa quarantine control point sa Barangay Rosario, Tandag City, Surigao del Sur.
Gi-ila ni Police Brigadier Gen. Joselito Esquivel, Jr, Regional Director sa Police Regional Office kon PRO-13 ang nadakpan nga si Ronito Montajos Enlig Jr. alyas “Jun-Jun”, 28-anyos, residente sa Barangay Bakingking, Esperanza, Agusan del Sur.
Nasayrang sakay si Alyas Junjun sa de-pasaherong van gikan sa lungsod s Marihatag ug padulong ngadto sa Tandag City dihang gipangitaan sa police personnel nga nag-man sa quarantine control points og mga dokumento nga rikisitos sa tanang mga pasahero kondiin wala kini nakapresenta og bisan unsang valid ID, travel authority ug medical certificate.
Atol sa interview, nasayran sa kapulisan nga si alyas Junjun, usa diay ka aktibong miyembro sa New People’s Army nga nagdala sa code name nga “Darel” ilalom sa Guerilla Front 16, Regional Sentro-de-Gravidad (RSDG) nga naglihok sa probinsiya sa Surigao del Sur sukad niadtong Pebrero 28 ning tuiga.
Gibutyag ni Alias Junjun nga mi-eskapo siya sa iyang grupo samtang nag-operate sa bukirang parte sa Marihatag aron ipadayon ang iyang plano pagsurender sa gobyerno.
Ang Tandag City Police Station nakig-alayon na sa 7th Special Forces Company, Philippine Army nga naka-base sa Marihatag alang tukmang disposasyon.
