BUTUAN CITY – Gisaka na sa Caraga Regional Disaster Risk Reduction and Management Council ngadto sa red alert, ang status ning rehiyon subay sa padayong pag-ulan nga dala sa bagyong Tino.
Tungod niini, gibutyag ni Ronald Anthony Briol, tigpamaba sa Office of the Civil Defense kon OCD-Caraga nga fully activated na ang tanang mga personahe sa mga response agencies alang sa full emergency response.
Magtinabangay na usab ang Department of Social Welfare and Development, Department of Health, ang Armed Forces of the Philippines, Philippine National Police, ug mga Local Government Units sa paghatag og ayuda, ingon man pagpahigayon og rescue ug relief operations. Duna usa’y storm surge warning sa Dinagat Islands ug Surigao del Norte provinces nga duna’y gihabugong 3-metros rason nga la-uman ang coastal flooding ug kusog nga pagbalud sa kadagatan.
Sa pagkutlo niini nga balita, duna na’y kapin sa 17-mil ka mga indibidwal ang apektado sa daut nga panahon.
Sa pagkakaron, duna na usa’y gi-ablihan nga mga evacuation centers sa Surigao del Norte ug Dinagat Islands provinces. Mi-abot na usab sa 43 ka mga siyudad ug lungsod sa entiro rehiyon ang nagkansela sa ilang klase karong adlawa samtang laing 28 ang nagkansela sa ilang trabaho.
Kini gawas pa sa upat ka mga pantalan nga nagkansela sa ilang mga biyahe nga gilangkuban sa tulo sa Surigao del Norte ug usa sa Dinagat Islands. Tungod sa mga dagkong balud, gipanawagan sa opisyal ang tanan nga dili una mulawig sa kadagatan.
