BUTUAN CITY- Gitin-aw ni Roselyn Exaure, ang tigpamaba sa Cabadbaran City LGU, nga mandatory gayud sa ilahang lokal nga panggamhanan ang random drug test, sama sa ubang lokal nga pangamhanan sa nasod.
Ang maong pagtin-aw gihimo sa tigpamaba human nasikop ning nakalabayng adlaw ang usa ka J-O kon Job Order nilang trabahante sa Purok 3, Barangay 5 sa nasangpit nga dakbayan.
Naila ang maong suspitsado nga si Clark Gelrad Duerme, diin nakuha gikan niini ang usa ka heat-sealed transparent plastic sachet sa gituohang shabu, kansa dunay timbang nga 3 gramos, ug gibana-banang nagkantidad 20,400 Pesos.
Dugang ni Exaure nga walay pakyas ang maong tinuig nga pag pahigayon sa ilahang LGU og Random Drug Test.
Alayon niini, giangkon usab sa tigpamaba nga posible matud pang duna pay kauban ang maong suspek sa ilahang buhatan, ilabi na nga nagkaanam na og ka-high-tech ang mga tigpayuhot sa maong illegal nga drugas, sama sa G-cash na ang pamaagi sa pinalitay niini, ingon man bisan kon dunay random drug test, ang uban, makamao na sa pamamaagi nga manegative sa resulta sa ilahang drug test.
Sa kasamtangan, anaa na naka detine ang nasangpit nga suspetsado sa PDEA Regional Office XIII jail facility alang sa tukmang disposasyon, diin atubangon niini ang kasong may kalabutan sa Article II sa Republic Act 9165, kon “Comprehensive Dangerous Drugs Act of 2002”.
