BUTUAN CITY-Subli nang nahimong balaod ang sugyot nga naghatag sa Presidente sa nasud nga kunhuran o suspendihon ang excise tax sa lana. Kini human gipirmahan ni President Ferdinand Marcos Jr. ang Republic Act No. 12316.
Ubos sa balaod, gihatagan ang Presidente og emergency powers nga suspendihon o kunhuran ang excise tax sa mga produktong petrolyo, base sa rekomendasyon sa Development Budget Coordination Committee (DBCC) ug sa pakigtambayayong sa Secretary sa Department of Energy.
Posibleng gamiton ang maong gahom ugaling mo-abot o mo-lapas sa 80 dolyar matag bariles ang presyo sa krudo sa pangkalibotanong merkado sulod sa usa ka buwan.
Sumala sa balaod, ang pagsuspinde o pagkunhod sa buwis posibleng ipatuman sa mga espesipikong produktong petrolyo.
Mahimo usab kining ipatuman isip hingpit nga pagsuspenso o partial nga pagkunhod sa excise tax, depende sa naglungtad nga kahimtang sa ekonomiya ug presyo sa lana.
Giklaro usab nga ang pagpatuman og suspension o pagkunhod sa excise tax dili molapas sa tulo ka buwan sulod sa usa ka tuig.
Parte kini sa mga lakang sa gobyerno aron mapagaan ang epekto sa padayon nga pagsaka sa presyo sa lana sa mga katawhan, partikular sa pamasahe, presyo sa palaliton, ug gastos sa transportasyon.
Mahimong epektibo ang balaod 15-ka adlaw human kining mapatik sa Official Gazette o sa usa ka pamahayag nga adunay halapad nga sirkulasyon.
