BUTUAN CITY – Posibleng ma-dismiss ang pulis nga gikan sa Agusan del Sur kinsa nadakpan sa gihimong drug-buy bust operation ning siyudad sa Butuan, human nagpositibo sa drug test nga gihimo sa Regional Forensic Unit o RFU-13 sa Police Regional Office-13 nga maoy gamiton alang sa ilang pagpasaka og tukmang kaso.
Sa eksklusibong interview sa Bombo Radyo Butuan, gipadayag ni Butuan City Police officer-in-charge PCol. Rommel Villamor, nga ilang isaka sa City Prosecurot’s Office ang kaso batuk nila Patrolman Michael Montalban Salgarino, 31-anyos, residente sa P-8, Brgy Salvacion, Bayugan City, Agusan del Sur ug kasalukuyang nadestino sa 1st Provincial Mobile Force Company (PMFC) sa maong lalawigan ug mga sibilyan nga sila Jun Jun Magarin Madjos, 30-anyos, ulitawo, residente sa P-3, Brgy Tiniwisan ug Joel Sabaldan Fernandez, 25-anyos, ulitawo, wala’y trabaho ug residente sa IRA Homes, Brgy Baan Km. 3 parehong sakop ning siyudad sa Butuan.
Sigon sa opisyal, notadong drug users ug pushers ang duha ka mga sibilyan nga dugay nang higala ni Patrolman Salgarino ug tungod kay na-assign man kini sa lungsod sa Sibagat, Agusan del Sur nga sikbit lang sa Butuan City, rason nga gi-adtuan niini ang duha aron mugamit og ilegal nga druga kondiin wala kini nakuhaan og suspected shabu.
