BUTUAN CITY – Patay si Police Staff Sergeant Jackie Lou Paniza, miyembro sa Philippine National Police (PNP) samtang kritikal ang iyang kauban nga si Jonathan Moscosa, parehong residente sa Purok-9, Brgy Poblacion, Prosperidad, Agusan del Sur, human nadisgrasya kagabii. Nahitabo ang insidente pasado alas-6:10 kagabii sa Purok-1, Barangay Awa, sa maong lungsod.
Nasayrang sakay ang duha sa usa ka itom nga motorsiklo samtang gisubay ang national highway. Tungod sa gubaon nga dalan, kalit nga nabulasot ang motorsiklo sa bangag, hinungdan sa ilang pagkahagbong.
Naligsan gilayon sila sa nagsunod nga Bachelor bus nga gimaneho ni Fuctoso Venturado Larobis Jr., 58 anyos, residente sa Purok Centro Central, Tarragona, Davao Oriental.
Sa pagkakaron, ang drayber ug ang bus temporaryong gikustodiya sa Prosperidad Municipal Police Station alang sa tukmang disposisyon ug dugang imbestigasyon.
