BUTUAN CITY – Gideklarang drug cleared ang tibook probinsiya sa Agusan Del Sur sakop ning rehiyon sa Caraga. Gihimu ang maong deklarasyon sa gipahigayong 16th Barangay Drug Clearing Regional Oversight Committee kagahapong adlawa sa opisina sa Philippine Drug Enforcement Agency kon PDEA-13.
Sa pakighinabi ning sibyahan kang PDEA-Caraga Assistant Regional Director Irvin John R. Coderis, giklaro niini nga naka-comply sa tanang rikisitos aron mahimong drug cleared ang tanang barangay nga sakop sa probinsiya.
Tungod niini, kini na ang ikatulong lalawigan ning rehiyon nga nadeklarang gawasnon sa illegal nga drugas human sa Dinagat Island ug Surigao Del Sur.
Gikumpirma usab ni Coderis nga ang rehiyon sa Caraga ang dunay pinaka-daghang barangay sa tibook nasud nga nadeklarang drug cleared. Gipasalamatan nalang sa opisyal ang tanang stakeholders og partner agencies nga mihatag ug soporta sa kampanya kontra sa illegal nga drugas
Apan giklaro sa opisyal nga padayon gihapon ang pagmonitor nila sa mga lugar nga nadeklarang drug cleared. Sigon pa niini, base sa Dangerous Drug Board Regulation Number 3 series of 2017 nga maoy nagmugna sa Barangay Drug Clearing Program, dunay himoong re-validation sa mga lugar sa matag-kwarter.
Lakip sa palisiya nga kung dunay makitang bag-ong misulod nga nagdula sa ginadiling buhat, kinahanglan kining ireport sulod sa 30 ka adlaw. Kinahanglang gikan sa barangay ang impormasyon diin pwede sila mismo ang mohimo og aksiyun.
Mamahimo usab nga isumbong nila sa kapulisan aron malusad ang illegal drug operation.
Nagbahad usab ang opisyal nga sampolan nila pinaagi sa pagpasaka og kaso ang mga barangay opisyales nga mibalewala sa programa kontra sa illegal mga drugas.
