BUTUAN CITY – Malipayong gitaho ni Lieutenant Colonel Glennford C Libre, Commanding Officer sa 23rd Infantry Battalion, Philippine Army nga cleared kon gawasnon na sa insurhensiya ang probinsiya sa Agusan Del Norte.
Sigon sa opisyal nga sa karun wala nay kalihukan sa New People’s Army kon NPA sa kabukiran diin ang katapusang miyembro nga taga Buenavista nakasurender na.
Sumala pa ni Lt. Col. Libre nga wala gayud siya nagdahum nga muabot kini nga panahon nga hingpit nang mawala ang grupo sa Agusan Del Norte ilabina sa kadaghan sa miyembro sa maong grupo niadtong panahon nga bag-o pa siya nadestino dinhe sa probinsiya.
Ang nasangpit nga kalampusan tungod matud pa tabang sa paningkamot sa lokal og probinsiyal nga kagamhanan sa Agusan Del Norte.
Tungod niini, gitutukan karun sa kasundaluhan ang pagpadayon sa paningkamot sa mga partner agencies ilabina ang pagpaabot sa gikinahanglan sa kumunidad.
Ang mga kakulangon matud pa nga ilang nakita sa gobyerno kaniadto, ang maoy gitunol sa karun aron wala na silay rason nga mogamit pa og armas aron makigbatuk sa gobyerno.
Gitutukan usab nila karun ang pag-atiman sa mga nagsurender nga base sa ilang datus anaa na sa 208 sa katibuk-an.
Gi-proseso nga ma-enrol ang 11 nalang niini diha sa E-Clip aron madawat ang mga tabang gikan sa nasyunal nga kagamhanan sama sa bayad sa armas nga ilang gisurender.
Kini gawas pa sa nadawat na nilang tabang gikan sa lokal og probinsiyal nga kagamhanan.
Gibutyag usab sa opisyal nga aron dili na gayud mobalik pa sa kabukiran ang maong mga Friends Rescues kon FR, gi-enroll sila sa amnesty program og gihatagan usab sila og Safe Conduct Pass sa National Amnesty Commission.
Tumong niini nga mahaw-as sila sa kasong ilang gi-atubang og makapanginabuhi nga dili mahadlok nga arestuhon tungod sa kasong ilang giatubang may kalabutan sa ilang pagsampa sa walhong grupo.
