BUTUAN CITY – Nanguna ang Police Regional Office kon PRO-Caraga sa 17 ka mga police regional offices sa tibook nasud sa Crime Solution Efficiency kon CSE alang sa Octobre 2018.
Ang Regional Investigation and Detective Management Division nakatala og katibuk-ang 802 ka crime volume nga gilangkuban sa 150 ka index crimes ug 652 ang non-index crimes sukad sa Oktobre uno ngadto 31, 2018. Sa 802 ka crime volume, 690n niini ang nasolbad sa kapulisan nga nagmarka sa CSE sa 86.03 porsiento.
Nagsunod sa PRO-13 ang National Capital Region Police Office nga dunay 81.82% porsiento isip ikaduha og ang PRO-11 sa 76.63 porsiento nga naghawid sa ikatulong puwesto.
Gipasalamatan ni Chief Supt Gilberto DC Cruz ang kumunidad, uban pang law enforcement agencies ug tanang stakeholders nga mihatag ug kabahinan sa pagsolbad sa kapulisan sa natigayong kremin ning rehiyon.
Sumala pa ni Cruz nga usa na usab kini ka kadaugan nga angayang ikaasegarbo sa kapulisan ug Caraganon dungan sa panghinaot nga kini mamintina sa musunod pang mga bulan.
Ang CSE usa ka percentage sa nasolbad nga kaso sa katibuk-ang numero sa kremin nga gihawiran sa kapulisan sulod sa gitakdang panahon.
