BUTUAN CITY – Proactive karon ang Police Regional Office kon PRO-13 subay sa ika-52 nga anibersaryo karong adlawa sa Communist Party of the Philippines-New People’s Army kon CPP-NPA.
Sa eksklusibong pakighinabi sa Bombo Radyo Butuan, gipadayag ni PRO-13 information officer PMajor Dorothy Tumulak nga nag-deploy sila og dugang mga personahe tungod kay naka-full alert man ning adlawa ang tanang mga police units sa tibuok rehiyon aron ma-monitor ang mga kalihukan sa walhong grupo.
Kini ilabina nga duna’y nakuhang impormasyon gikan sa ilang intelligence community nga muhimo og pagpangatake ang maong grupo sa mga piniling police stations kondiin sa mga lugar nga target nilang atakihon, mas hugot nga siguridad ang gipatuman.
Giklaro usab sa opisyal nga wala’y angayang isilibrar ning adlawa ang CPP-NPA tungod kay sama sa baruganan sa Philippine Army, wala matud pa’y nahatag nga kaayuhan ang maong grupo ngadto sa mga tawo kondili mga pagpanghulga lang.
Kanunay usab matud pang gipahimangnuan ang kapulisan sa ilang personal nga siguridad aron dili mabiktima sa mga rebelde sama sa nahitabo sa pipila nila ka mga ka-ubanan ning mi-aging mga bulan.
Aron magpadayon ang suporta sa komunidad ngadto sa ilang han-ay, gipakita sa kapulisan ang sinsiro ang ilang gipatumang mga programa ug mga proyekto alang sa mga kanhi rebelde.
Pinaagi matud pa niini, mas mudaghan pa ang mga nagpabilin pa sa maong kalihukan nga madani pagbalik na sa sabakan sa balaud sa ingon matagamtaman ang mga programang alang kanila.
Nasayrang sa pagkakaron, halos 300 na ka mga kanhi rebelde ang mitahan na sa sabakan sa balaud wala pa’y labot sa uban nga anaa pa sa kostudiya sa Philippine Army.
Samtang simpleng gisa-ulog sa Bagong Hukbong Bayan ang ilang ika-52 nga anilbersaryo karong adlawa kansa lahi sa nangaging katu-igan base na sa pagkumpirma ni Ka Diwa Habagat, nagpa-ilang tigpamaba sa New People’s Army-Agusan del Norte sa eksklusibong pakighinabi sa Bombo Radyo Butuan.
Sigon ni Ka Diwa, ang simple nilang selebrasyon wala matud pa magpasabot nga nagkahuyang na ang ilang pwersa sama sa gitu-uhan sa tropa sa mga otoridad kondili tungod kini sa mga pagbabag nga gihimo, rason nga wala matud pa sila’y gipang-imbitar.
Aminado si Ka Diwa nga ubay-ubay sa ilang mga ka-ubanan ang mipahulay na sa ilang kalihukan kansa dili matud pa nila mapugngan tungod kay boluntaryo lang ang pag-abin sa ilang grupo kansa dili matud pa angayang himuong basehan aron isulting nagkahuyang na ang lang pwersa.
