BUTUAN CITY – Naka-full alert karon ang Police Regional Office kon PRO-13 subay na sa hugot nga monitoring sa mga tawong posibleng makonsiderang ‘Persons Under Monitoring’ kon PUMs o kaha ‘Patients Under Investigation’ kon PUIs subay na sa nagkataas nga kaso sa Coronavirus Disease-2019 kon COVID-19 dinhi sa nasud.
Alayon niini, gimanduan na ni PBGeneral Joselito Esquivel Jr., regional director sa PRO-13 ang tanang mga municipal ug city police chiefs nga makig-alayon sa mga local chief executives aron mahan-ay ang ilang himuong mga lakang.
Gibutyag ni PMajor Renel Serrano- information officer sa PRO-13 sa eksklusibong pakighinabi sa Bombo Radyo Butuan, nga nag-detail na sila og mga pulis sa himuong mga COVID-19 checkpoints aron magmintina sa hapsay nga thermal scanning nga himuon diha sa mga motorista.
Giklaro sa opisyal nga hatagan usab og mask ang ilang mga pulis isip proteksyon sa ilang kaugalingon dungan sa pagklaro nga kinahanglang dili mabiyaan sa matag-police station ang ilang trabaho samtang bahinon ang ilang mga tawo sa ipatuman shifting alang sa COVID-19 monitoring.
