BUTUAN CITY- Malampuson nga nasikop ang usa ka priority drug personality sa gipahigayong buy-bust operation kagahapon sa hapon Marso 23, 2026 sa may Barangay Fort Poyohon, Butuan City, diin asa nakompiska ang 100 gramos nga shabu kansa gibana-banang nagkantidad og P680,000.
Ang operasyon nagpakita sa kusog ug kalig-on sa panaghiusa sa mga ahensya sa kapulisan ug anti-drug enforcement, pinaagi sa koordinado nga plano, pagtinabangay sa intelihensiya, ug husto nga taktikal nga aksyon.
Narekober sa operasyon ang 20 ka heat-sealed transparent sachets nga adunay puti nga crystalline substance nga shabu, kauban ang buy-bust money nga gigamit sa transaksyon.
Ang kalampusan gipahigayon pinaagi sa panaghiusa sa Philippine Drug Enforcement Agency Regional Office kon PDEA RO 13 Agusan del Norte Provincial Office (lead unit), PDEA RO 13 Legal and Prosecution Unit, PDEA RO 13 Regional Special Enforcement Team, Butuan City Police Station 2, City Drug Enforcement Unit, ug PIT-Agusan del Norte.
Gipasiugda ni Regional Director Laurefel Gabales sa PDEA RO 13 nga ang ingon nga panaghiusa kusog nga nagpalig-on sa kampanya sa gobyerno batok sa droga.
Matod pa niini, pinaagi sa pagtinabangay, mas mapalambo ang paggamit sa mga rekurso, mas mapaayo ang operasyon, ug masiguro nga ang mga high-value targets mapahimutang sa hustisya.
Ang suspetsado karon giandaman og kaso ilawom sa Section 5 o Sale of Dangerous Drugs, Article II sa Republic Act 9165 o ang “Comprehensive Dangerous Drugs Act of 2002” nga giamendar.
