BUTUAN CITY – Walay gilauman nga pagtaas sa presyo sa mga tambal hangtod sa bulan sa Hunyo ning tuiga taliwala sa epekto sa giyera sa Middle East.
Sumala sa presidente sa Private Hospitals Association of the Philippines (PHAPi) nga si Jose Rene de Grano, wala pa’y ospital nga miyembro nila nga nag-report bahin sa kakulang o pagtaas sa presyo sa mga gamit bisan pa sa pagsaka sa presyo sa lana.
Gipasabot ni de Grano nga kasagaran mulungtad pa og duha hangtod tulo ka bulan una ipahibalo sa supplier sa mga ospital nga nisaka na ang presyo sa tambal. Dili sama sa mga kompanya sa lana nga musaka dayon ang presyo bisan og daan pa ang stock.
Gidugang pa niya nga tungod kay daghan og kapilian ang mga ospital ug nangita sila sa labing barato nga proposal aron mas dako ang kita, mapugos ang mga kompanya sa tambal nga ipabilin o ubsan pa ang presyo aron dili mawala ang ilang kliyente.
Apan, dili usab sayon para sa mga private hospitals nga magpatuman og taas presyo tungod kay kadaghanan sa presyo sa tambal kontrolado sa gobyerno taliwa nga kadaghanan sa mga tambal gi-import pa gikan pa sa India ug China.
