BUTUAN CITY- Gikumpirma sa Commission on Elections kon COMELEC nga mitukma ang fingerprints sa election record ni suspended Bamban, Tarlac Mayor Alice Guo ngadto sa Chinese National nga si Guo Hua Ping.
Sigon ni COMELEC Chairman George Erwin Garcia, migawas sa findings sa ilang fingerprint experts nga nag-match ang fingerprints sa mga dokumento ni Mayor Guo ug sa maong Chinese national.
Apil na niini ang iyang dokumento sa Immigration nga gigamit sa National Bureau of Investigation kon NBI, NBI clearance, certificate of candidacy, application for voter’s registration, Election Day Computerized Voter’s List niadtong tuig 2022 ug Election Day Computerized Voter’s List Barangay ug SK Elections niadtong 2023.
Base matud pa sa ilang law department, duna’y factual basis aron magpadayon ang imbestigasyon. Desisyunan nila sunod semana kung kasuhan na ba ang suspendidong mayor ngadto sa Regional Trial Court tungod sa material misrepresentation nga nakalapas sa Omnibus Election Code.
