BUTUAN CITY – Gitangtang na sa Department of Agriculture (DA) ang poultry ban nga una nang gipahamtang ngadto sa Japan base na sa gipirmahan ni Agriculture Secretary Francisco Tiu Laurel Jr. nga Memorandum Order No. 31.
Tungod niini, mahimo nang mu-angkat ang gobyerno og mga poultry products gikan sa maong nasud apil na ang karneng manok, domestic birds, itlog, piso ug uban pa.
Una nang gipahamtang ang temporaryong poultry ban human gitaho sa Japan nga pagpositibo sa bird flu ang pipila sa ilang mga manukan niadtong November, 2023.
Bag-uhay lang usab gitaho sa Japan ngadto sa World Organization for Animal Health nga naresolba na ang problema nila sa bird flu ug wala na’y natumbok nga kaso niini sukad pa niadtong Hunyo 2, ning tuiga.
Nakalatid sa Memo ni Sec. Laurel Jr. nga wala na’y hulga sa kontaminasyon sa mga poultry products nga mahimong angkaton sa Pilipinas gikan sa Japan, human sa gihimong evaluation sa ahensiya. Base sa datos sa Bureau of Animal Industry, ang Japan usa sa pinakadakong supplier sa imported meat sa Pilipinas.
